Infiammi te tan sorkarin theihtawp a chhuah dawn: PWD Minister

by News Editor

Tualchhung News

ZORAM TODAY| 21st June, 2024 (Fri): PWD Minister Vanlalhlana chuan vawiin chawhma khan Z.N. Higher Secondary School, Bawngkawn in 6th Inter School Swimming Competition a an school in medal an lak lawmna puala programme Bawngkawn South YMA Hall-a an buatsaih chu khuallian niin a hman pui.

Minister chuan naupang leh thalai zinga tui hleuh thiam tak tak an awm chho zel chu lawmawm a tih thu sawiin, medal latute chu a lawmpui thu a sawi a.

"Ei leh in a that chhoh zel avangin leh hmanruate a that chhoh zel avangin Mizoram chu infiamna khawvelah hma a sawn zel a, sawrkar pawhin infiammi te tan theihtawp a chhuah zel dawn a ni," a ti.

Infiamna leh zirna kal kawp theilo anga ngaihdan awm thin chu thlak tha a tih thu Vanlalhlana hian a sawi a. "Khawvel a infiammi hmingthang tak tak zingah zirna degree sang tak tak nei tel an awm a, zirna ngaihthah chuang lovin tumruh tan chuan thil pakhat chauh ni lovah hlawhtlinna a hmuh theih a ni," a ti a, zirlai kalkhawm te chu ruihhlo laka fihlim tlat turin a chah bawk.

6th Inter School Swimming Competition hi Mizoram Aquatics Association buatsaih a ni a. Z.N. Higher Secondary School atang hian zirlai 17 telin, Gold Medal paruk leh Bronze Medal pakhat an lak bakah an zirlai pakhat chuan Open Category ah Gold a la bawk a. Senior Category ah champion in, Junior category ah 1st runner up an ni bawk.